~डा.सोमबहादुर चातेला~
हेथे हिस्वाना सा लिता खिनिङ
माओल्हेस्वाना बाहार बुझिलि ?
साझिनिको आबा बिदेस हानेहि
टाका काउरि कामाइहि दोहि ।
बोसिको बाइ पोर्हेलि काठमान्डु लोहि
काथा बुझिहि, गिहि दोअ्का काथा हि ।
देराको आजाइ हाया माङतेङ बुह्रिहि
आजु हाले चोइतेङ बुह्राहि ।
एला हाइ नेलाइ बेबालाइ इन्साङ पास्वाना
लाम्फाको आजाइ, आजु, जुवा, जुबे पाका भाइपाङ ?
बेबालाइ डारु चुम्का खुरहोइ फुल्टिङ चासु
मालेखेका नेलाइको इतिहास लेखेसु ।
मिसिङ बोझा धाःका पुरिङता ग्यान धाःसु
आधुनिक जामानाको काम पासु ।
हाया माङगिल्का बेला काथा धिर्सु
ताइको चेताना, ससक्तिकरन पासु ।
मे एम्का थामेता कानुनको किताप तेङसु
देस बिदेसको कानुन, नियमगेलाइ गिसु ।
परिबर्तन नानिको जुम्नि लोका माको
काथा बुझिसु, एलासोङ आगाइसु ।
मिलिङ, कोध्ला चाःका खुरहोइ
किताप, फुल्टिङ चाःसु ।
ताइमि बुङ आगाइसु
बोमिहेङ बुङ आगाइपासु ।
नेलाइ दोङ आगाइनु
जाहान आगाइन्हाङ ।
नेलाइ दोङ बल पानु
सामाज फेरिन्हाङ ।
फुल्टिङको मसिता हि सक्ति
मसिहोइ तुरुरुपा इतिहास लेखेसु ।
तिम्पापिसु दुनियाहेङ हासु दोअ्खे
नेलाइ मादोस्वाना पालि दोअ्तेङ ?
डा.सोमबहादुर चातेला धिमाल
जोरपाटी, काठमान्डु
(स्रोत : धिमाल डट कम)
