~सुधीर छेत्री~
खबरमा छ :
नव-फासीवादका गीत सुनिरहेछन्
सेता ब्वाँसाहरुले।
काला स्यालहरु दगुर्छन्
विस्फोटका चोइटाले बिझाएर।
मेरो सरकारी नोकरी छैन।
मेरो जमीन, घर, माटो केही छैन।
छैनहरु नै अब आरडीएक्स भएर पड्किँदैछन्।
गाउँ-घरका साइँला सिसिपसहरुलाई
ठेल्दैछ खेत उकालो पासुँला र छेपारीका हर्सपावरहरुले।
रमाइला दिनका फुटेजहरु
सम्पादन गरिबस्छ रोमान्टिकहरु।
एकान्तलाई उसिनिबस्छ।
कमरेडले खनेर निकाले
पुरानो सङ्ग्रहालयबाट आज,
छात्रामाथि यौन-उत्पीडन गरेको
प्राध्यापकलाई।
विद्यालयले रङ्ग फेरेर पाकेको छ।
हुलिगन्स जताततै।।
-कालेबुङ
(स्रोत : विचलन प्रकाशन, कालेबुङ)
