~डम्बर धिमाल ‘प्रकृति’~
का गोताङ लापिहोइ काला
कांको खामालगेलाइहेङ
कांको भूमिहेङ
कालाउ, कांको बादेलहेङ
हाइं दोनु
कांको खामालहोइ कासेङ मानाल्हि
कांको भूमिहोइ कासेङ माथाम्बेहि
कालाउ, कांको बादेलहोइ कासेङ माथुम्हि
एन्साङ तें का लापिहोइ काला
कांको भूमि, खामाल रो बादेलहेङ
एइ तें जातिङ्को लापिहोइ काला
इङ्को सिघुँनको बिहाहेङ
इङ्को हितिको चोखाहेङ
कालाउ,
इङ्को दिना न्हाम्का गान्धाहेङ……
हाइं दोनु
कांको खामाल दोसा सिघुँन पल्किका हि
कांको देरा हितिदोसा मोन्हाका हि
कालाउ,
कांको वातावरन हितिको गान्धाता न्हाम्का हि
ओदोङ तें कांको देराहेङ
सिघुँन, सैतानको हुँकार चाहिखें
गुपुसगेलाइको हितिको बलि चाहिखें
उघाइलाउ ले रो ढोलको आवाज चाहिखे ।
तरो या कांको दुर्भाग्यवस !
हाइं दोनु कासेहेङ,
सिघुँन रो सैतानको चेन्ताङ हानिलि माएल
हिति खाङ्लि माएल
कालाउ,
हितिबें को गान्धा न्हुँम्लि माएल !
खाङ्नि एला
एलातें कांको देराको नाल्पाका दोङ
सिघुँन्ता एसामान जेङ्का हि
कांको भूमि हिति झोरा भाइपा जेङ्का हि
आरोङ वातावरन गान्धाता संकोच जेङ्का हि
ओदोङ्तें का लापिहोइ काला
कांको भूमि
कांको देरा
कालाउ, कांको बादेल ……
कालाउबुङ
का दुरेसोङ लाबुङ
चिन्ता तें पाखाँ नि !
कांको भूमिहेङ
कांको देराहेङ
कालाउ, कांको बादेलहेङ……
हाइं दोनु
कांको ताइको दोकादोङ
इङ्कोङ एलोङ भूमि हि
इङ्कोङ देरा हि
कालाउ, इङ्कोङ बादेल हि …… !
का इङ्कोङ भूमिता जल्मिघाँ
रो इङ्कोङ देराता बाराघाँ
कालाउ,
बादेल भाइपाङ फिंजार्नाघाँ
एन्साङ्तें कासेङ चिन्ता लागिखें
कांको भूमि, देरा, कालाउ बादेलको !
सिघुँनगेलाइं हेथे घिङ्सुखे
हितिको झोराहोइ हेथे चिउसुखे
कालाउ तरवारहोइ हेथे धाइ निन्चाहि
बोन्दुक्को कुन्जाहोइ हेथे धिं निन्चाहि
कांको भूमि
कांको देरा
कालाउ, कांको बादेल ……
एला थेकेपाङ
घिङ्सु दोङ्खे, चोसु दोङ्खे
इङ्को सिघुँनगेलाइं
सैतान जेन्तेङ ……
कांको पुर्खाको हिति चुसिदोङ्खे
लिम्याहाँ जेन्तेङ ।
कासेहेङ मन हि,
कांको भूमि पाहार जेङ्का खाङ्लि
कांको देरा एमनको जेङ्का खाङ्लि
कालाउ,
कांको बादेल र्हुतासो चुम्तेङ लोका झेङ फुरु
र्हिमाको फाइस्लाम पाका खाङ्लि …… !!
डम्बर धिमाल ( प्राकृति )
नपा. उर्लाबारी-८ मोरङ दुर्गापुरी मेहरी चोक ।
(स्रोत : धिमाल डट कम)
