~विष्णुबहादुर सिंह~
१.
बाढी आएर
खेत बगाएपछि
खोलो सुकेछ ।
२.
आउनेछु म
मङ्गलग्रहमाथि
हावा लिएर ।
३.
समुद्रभित्र
गहिराइमा डुब्दा
माछा तर्सेछ ।
४.
मध्यरातमा
नर्वेको त्यो गाउँमा
सूर्य उदायो ।
५.
दोपहरमा
चन्द्रमालाई देख्दा
सूर्य रिसायो !
६.
मुगलानमा
माटोलाई छामेर
देश सम्झिएँ।
७.
पानीका लागि
मूल खोजेर हिँड्दा
पसिना मिल्यो ।
८.
चिसो सिरक
दुई जोडीको प्रेम
तातिँदो रैछ ।
९.
पर्खेर बसें
महिनाको पुच्छर
सङ्क्रान्ति रैछ ।
१०.
औँसीको रात
कालो सागरभित्र
चन्द्रमा डुब्या ।
(स्रोत: बगर साहित्यिक पत्रिका – वर्ष २३ पूर्णाङ्क ७१ – २०६१ कार्तिक-मार्ग-पुस)
