~जीवन क्षेत्री~
यो नयाँ वर्ष,
खै के नयाँ वर्ष
तुवाँलोको बादल,
आँशुको वर्षा,
आकांक्षाहरुको नदी,
अतृप्त इच्छाहरुको समुद्र
सँगुरझैं मोटाएका कुकुरहरु
बाँसझैं दुब्ला ‘खाते’ हरुलाई
भुक्दै, लखेट्दै तर्साइरहेछन्
बाहिर कोही कठ्यांग्रिइरहेछ
हामी अर्को सिरक खापिरहेछौं
क्षितिजमा छ धाँजा फाट्ने गर्मी
हामी गमलामा पीपल रोपिरहेछौं
पीपलका पहेंलिएका पातसँगै आउने
यो नयाँ वर्ष, खै के नयाँ वर्ष
पीपल पलाओस् भित्ताको कापमा
र फूटाओस् इंट्टा र सिमेन्टलाई
गर्जिओस् आकाश, धाँजा फाटोस् जमीन
हिउँदले कँपाओस्, वर्षाले भिजाओस्
पुराना जुत्ता त्याग्नुको बदला
खिया लागेका विचार त्यागुन् मानिसहरु
बगैंचा कलमी गर्नुसट्टा
ढोंग र पाखण्डको एक पत्र काटुन् मानिसहरु
रोउन् मानिसहरु, हाँसुन् मानिसहरु
आँशु झार्नसम्म नअड्कलुन् मानिसहरु
प्लाष्टिकको कुर्सीमा बाँधिएको घोडाजस्तै
नबाँधियोस् यो नयाँ वर्ष
खुलोस् आकाश, उन्मुक्त होउन् मानिसहरु
रुन र हाँस्न सिकुन् मानिहरु
शुभ नयाँ वर्ष
(स्रोत : रचनाकारको ब्लगबाट सभार)
