~बिभोर बराल~
चारैतिर
आगो बलिरहेछ
म
काठमाडौँ नाम गरेको
शान्त टापुमा रहेको
मेरो सुरक्षित घर भित्र बसी
फुर्सतको समयमा
लेखिरहेछु
‘शान्ति कविता’
यसोगर्ने
म एक्लो भने होइन
थुप्रैछन् म जस्ता यहाँ
– कोही चित्र बनाउँदैछन्
– कोही गीत गाउँदैछन्
– कोही बेलुन उडाउँदैछन्
– कोही घण्टी बजाउँदैछन्
– कोही गम्भिर बहसमा मस्तछन्
– कोही सडक तताउनमा ब्यस्तछन्
म जस्तै थुप्रै मान्छेका
थुप्रै कुराहरू
शान्तिकोलागि
हामी सबै
केही न केही गरिरहेकैछौँ
यही काठमाडौँ नाम गरेको
शान्त टापुमा बसेर
चियाको चुस्की लिँदै
फुर्सतको समयमा।
Bibhor Baral ,
Tangal, Kathmandu, Nepal
(स्रोत: तन्नेरी डट कम – Issue 11 – Kartik, 2062)
