~कैलाश भण्डारी~
मोटर मात्रै भएर के गर्नु र ?
देशमात्रै भएर के गर्नु र ?
चाहिन्छ कुशल ड्राइभर
देश हाँक्ने ड्राइभर ।
तर, विडम्वना हेनुस् वासुदाइ
हामीकहाँ कुशल ड्राइभरै छैन
काम चलाऊ मात्रै छन्
त्यसैले दुर्घटना भइरहन्छ
कुरूप बनाइरहन्छ
त्यसैले हामी
जहाँको त्यहीँ छौं ।
अरू कहाँ पुगिसके
के-के अनेकथरी उन्नति गरिसके
तर वासुदाइ
हामीकहाँ तेरो मेरोमै बितिरहेछ
ठोकठाक, पिटपाटमै बितिरहेछ
झगडा-फसाद, हिंसा, बेइमानमै बितिरहेछ ।
वासुदाइ,
कुशल ड्राइभरविनाको यात्रा
गन्तव्यहीन हुँदोरहेछ
दुर्घटना, एकपछि अर्को दुर्घटना हुँदोरहेछ
अनि अशान्ति नभए के हुन्छ वासु दाइ ?
कुशल ड्राइभर विनाको यात्रा
अक्सर यस्तै हुँदोरहेछ ।
(स्रोत : नेपालीकविता डट कम)
