~बबुल लामा~
डाँडा काँडाहरु नांगा भइसकेकै छैनन्
न त पहिरोले गाँउ बस्तिहरु पुरै बगाएकै छ
उल्लु, किन कराउँछस् डाँको छोडेर
ज्ांगल अझै सकिएकै छैन, अहिल्यै के को बृक्षारोपण ।।
भर्खर त आगो बलेको छ,
दन्दनी दन्केकै छैन, पाली र ग्वालीहरु मात्र बलेको छ,
उल्लु, किन रुन्छस् भक्कानो फोरेर
घर खरानी हुन बाँकी नै छ, अहिल्यै के को दमकल ।।
बल्ल त साँचो हातमा आएको छ
भण्डार त अझै पुरा खोल्न भ्याएकै छैन
हे बुद्धु, किन आत्तिन्छस् यसरी
ढुकुटी अझै रित्तिएकै छैन, अहिल्यै के को हतार ।।
भर्खर त पाँच हजार नाथे मान्छे मारिएको छ
बैध रुपमा प्रजाको तन्त्र खत्तम भएकै छैन
हे नालायक, किन बहुलाउँछस् वार्ता वार्ता भनेर
मान्छे मार्न अझै भुसुक्कै बाँकी छ, अहिले के को वार्ता ।।
भर्खर त चाँजो पाँजो मिल्दै छ
धन, खुँडा खुकुरी र विकासे लठैतहरु त आइपुगेकै छैनन्
हे हरामखोर, किन मर्नै खोज्छस् यसरी
तेरो देश अझै पराधिन भएकै छैन, अहिल्यै के को शान्ति, अहिल्यै के को वार्ता ।।
जुलाई २९, २००२
