~प्रमोद धिताल~
आक्रमण हुनेछ अदृष्य
अदृष्य हुनेछन् हतियार
भूमिगत हुनेछन् षडयन्त्रहरु
शूक्ष्म किटाणुझैं आक्रमण गर्नेछन्
दुश्मनहरुले अदृष्य मोर्चाबाटै
देखिनेछैन
निशाना लगाएको
हुनेछैन कुनै भिडन्त
सुनिनेछैन कुनै पीडाको आहत चित्कार
मिल्नेछैन अवसर माग्न कसैसँग गुहार
असम्भव हुनेछ देख्न
रगत बगिरहेको घाऊ
भेटिनेछैन लाश
सुनिनेछैन कोही आफन्तको शोकमग्न क्रन्दन ।
यसरी हुनेछ हत्या
सुनसान
निःशब्द
सबैभन्दा भयानक कुरा
त्यो हत्यापछि
सोच्न छोडिदिनेछ दिमाग
गर्न छोडिदिनेछ प्रश्नहरु
बाँकि रहनेछैन कुनै उत्तेजना
जुन हत्यापछि
आफूखुसी खरिदनेछ बजारले
र बेच्नेछ आफूखुसी
यसरी हुनेछ मेरो अन्त्य
– दाङ
(स्रोत : शब्दशिखा डट कम)
