~लक्ष्मी उप्रेती~
कल्पनाको तरङ्गमा
जब सुन्दर भाव आउँछन् आँखामा
तब ममा अटाउन नसक्ने
खुसीका चित्रहरू कोरिन्छन्
सपनामा देख्न नसकेका
रङहरू छचल्किन्छन्
वसन्तको सुखानुभूति गर्दै
एक निमेष स्वाँट्ट आउँछ, झ्वाट्ट जान्छ फेरि
पलभरको मिठास
मनभरि थन्क्याउन खोज्छु
आँखाभरि सजाउन खोज्छु
हजार सपना र अर्थमा ओइलिने
कल्पनाका रङहरू
क्षणभरमा नै चक्नाचुर हुन्छन् अनायासै!
यस्तो लाग्छ
कहाँ पुगेकी म
झस्कँदै आफूलाई भेट्छु
कल्पना जीवनमा सजाउने सुन्दर तस्बिर हो ।
(स्रोत : युवामञ्च २०६६ साउन)
