~रुपिन्द्र प्रभावी ‘कटु’~
बालुवामा पानी हालेर के पो हुँदो रहेछ र
कुकुरलाई जुरुक्क उचालेर के पो हुँदो रहेछ र
यदि नयाँ केही बनाउन सकिँदैन भने
पुरानालाई मात्र फालेर के पो हुँदो रहेछ र
आकार दिनु पो रहेछ मुख्य कुरो त साँच्चै
आगो फुक्दै फलाम गालेर के पो हुँदो रहेछ र
फाटेको र ढाँटेको कुरो लुक्दैन भन्थे सबै
ढाकछोप गर्न ठाउँठाउँ टालेर के पो हुँदो रहेछ र
भीर खोज्दै हिँड्छ ऊ कति भन्नु रामराम पनि
हामीले मात्र सम्हालेर के पो हुँदो रहेछ र !
– समिभञ्ज्याङ्ग–५,लमजुङ
