~प्रमोद धिताल~
साट्नैपर्ने केहि मौलिक भावना
सोच्नैपर्ने केहि महत्वपूर्र्ण विषय
चाल्नैपर्ने केहि निर्णायक कदमहरु
साँचेको छु कुनै दिनको लागि
बस, यतिखेर मलाई गर्नुछ
आवश्यक कामहरु !
यतिखेर धेरै आवश्यक कुराहरुले
थिचिरहेछन् मलाई
आवश्यक कुरा
जसबाट फुर्सद मिलाएर
व्यक्त गर्नुछ प्रेम
आवश्यक कामहरु
जसबाट मुक्त भएर
लेख्नुपर्नेछ जीवनको कविता
आवश्यक काम
जसबाट फूर्सद मिलाएर
गर्नैपर्नेछ जीवनमा निर्णायक क्रान्ति !
मनभित्र जमेको दुःखको पोखरीलाई
निकाश दिन आँखाको डिलबाट
मिलाउनुपर्नेछ साइत
बस, यतिखेर गर्नुछ केबल आवश्यक कामहरु !
– दाङ
(स्रोत : शब्दशिखा डट कम)
