~इन्द्र गिरी~
यो अनुहार कस्तो कस्तो
भर्खरै ब्युटिपार्लरबाट
फेसियल गरेर निस्किएकी
काली केटीको
उज्यालो अनुहारजस्तो
यो अनुहार कस्तो कस्तो
कहिले भने
आमाको पछ्यौरी समातेर
अघि पछि गर्दै हिँड्दा पनि
केही नपाएपछि
घोसे मुन्टो लाएको बालकजस्तो
यो अनुहार कस्तो कस्तो
फेरि कहिले भने
अर्काको बारीमा पाकेको
पहेंला बेलौती
झटारो हान्दा पनि नझरेर
हरेस खाई
खिन्न अनुहार लगाएको बालकजस्तो
यो अनुहार कस्तो कस्तो
कहिलेचाहिँ
मुखौटो लगाएर
आफैंदेखि भाग्नखोज्दा /
आफन्तलाई छल्नखोज्दा
अचानक कुनै सर्कसमा
उभिन पुगेको जोकरजस्तो
यो अनुहार कस्तो कस्तो
-इन्द्र गिरी, सालबारी/ दार्जिलिङ
