~केशव गाहा ‘पाल्पाली’~
कहाँ मिल्छ समाधान सिमानामा कराएर ।
कस्तो पहिचान खोज्यौ देशलाई हराएर ।।
माया गर देशलाई तिमी नेपाली हौ भने ।
ठूलो गल्ती गरेका छौ देशै बन्दी गराएर ।।
पिल्सिएर सधैभरि तिम्रो राजनीतिभित्र ।
कति बाँच्छन दीनदुःखी आँसुधारा झराएर ।।
शङ्का धेरै लाग्न थाल्यो बसेका छौँ आज
देशप्रेमलाई तिमी सिमापारि तराएर ।।
बस्ने छैनन् चुप अब देशभक्त युवाहरू ।
तिम्रा भाला छुरासँग अनायासै डराएर ।।
– पाल्पा (हाल रायगढ, भारत)
(स्रोत : हाँक विक्ली – वर्ष ३३, अङ्क ६ – Dec., 30, 2015 – २०७२ पौष १५ गते, बुधबार)
