~जि.यश. गेलाल~
१
आस नभएरै निरास छ जिन्दगी
खास नभएरै निरास छ जिन्दगी
कल्पनाले मात्र नपुग्दो रहेछ
आभाष नभएरै निरास छ जिन्दगी
२
जब तिमीसँग मेरो साथ हुन्छ
सम्झ अब केही खास बात हुन्छ
हतार नगर केहीछिन पर्ख प्रिय
दिन जान्छ अनि पो त रात हुन्छ
३
त्यहाँ उ हुनुको आभाष नै खास हुने भए
टाढा हुँदा नि यादको दिलमै बास हुने भए
त्यो खास पललाई किन कल्पिएरै बस्नु पर्थ्यो
जब म बिनै ती यादहरुको सहवास हुने भए
४
उ आउँछ अनि रुन्छ मधुशालामा
यस्तै हुन्छ भनि सुन्छ मधुशालामा
अलिकति मधुरस लिँदै माहोल बुझ्छ
र आँशुले मुख धुन्छ मधुशालामा
५
मन जोडिंदाको धड्कन झन् कति मिठो
दिलबाट आउने कम्पन झन् कति मिठो
मन मिले दिल एकैभए बाँकि छैन केही
अनी तनहरुको स्पन्दन झन् कति मिठो
– जियश गेलाल
बयरबन, मोरङ्ग
(स्रोत : रचनाकार स्वयंले ‘Kritisangraha@gmail.com‘ मा पठाईएको । )
