~व्योम जी अवतार~
काचाबालज़ पुलुउ परिके
मङन्यार:
हकिन गाभलज़ तुहिउ मङर:
अआ सनो कखय पहार
नोकिन छेछेछप्सिउ एवीसीडीय खागर
वाइँद-वाइँद एक दुई सनो तीनय सलापयाल: सःसुसु
वान टुय चबनै धारो घामयाल:
कराउकि
रयलपयलज़ मारहिन्य जैद
धुली ताद खेमोलिउ
ङाजर्मिन्याकिन खालाका जुगङादा ङापुर्खार: यासिउस:
चुम्चुमो जालसाजील: थाङ्सिद
हैजैद
पलाङो ङा:सज रैसिउ ङामादैये
खङकुई ख्यादे झोउ ङामादैये
ङापाङत: तातेताते लिदे
ङालिपिय चेलाला बाङयाल:
ङाभाषा खिताउ अलिउ पाङो ङामादैके
ङाज्युङला रहस्यर: पलाउ ङामादैये
हैजैद मापाङन्य भारपा ङाताके
कराउकी ङासाहानय अमिनचिनाज़ माले
लेज माले ङास: मालिदुके पाल
अँ अङ्ग्यास्याउ स: मालिउ ङाताके
नोलाय् पाइँए रङर:
हैनी नोए कताज़ मारङ्यू सनो माजैयू पाल ।
हैजैदके घुरो परिके करकापय हुई
विवशताताय नम:ए ङैतः जाद
अअा सनो कखय पहारतिन तेउ लुङज़ुरिर:
एक दुई सनो वान टुय रूघाए कहँनिद
एवीसीडीय खागरसः अतकलिसिद
अभरमालिउ झिमर: सच्याङ्न्य
जोल: पार मङर: मादुमर
थाले कल्पनाय रङ्गिउ वैरः मावैर
ङालिपीय बाह्रखरीर: मासैर
कराउकी अाउर: ङामी माङ्कर
अँह ङामी ताउज़ मादुर
हैजैद
खर्कज मावैर सनो मासैर
ङाचेतैउस्याउ तादे
आउराय याथानाल: खोर्सिद
ङामी लिपि मङ सनो चोला ।
– बोम बहादुर घर्ति मगर (Byom G Awatar)
रोल्पा
हाल, घोराही ,दाङ
