कसले हत्या गर्यो पोथीको?
जो बासेको थियो
दिउँसो !
आगो त्यसलाई छाड्दैन
कसले हत्या गर्यो पोथीको?
जो बासेको थियो
दिउँसो !
कसले कलेजो भुट्यो कराहीमा पोथीको?
मृत्यु त्यसलाई उत्तरी ध्रुबतिर लान्छ
ठण्डा पार्छ
शेष पार्छ कक्राएर ।
कसले चपायो मासु पोथीको?
बिच्छिले त्यसलाई छाड्दैन
चैन दिंदैन
कसले हत्या गर्यो पोथीको?
जो
बासेको थियो दिउँसो
धिक्कार छ त्यसलाई
जसले
दिउँसो पोथी बास्दा
अलच्छिन हुने हल्ला फैलायो ।
पोथीको काम
के अरुलाई उज्यालोमा ल्याउने मात्र हो?
कुन्ता दिदी !
पोथी बास्न पाउनु पर्छ, हैन त?
मौन धर्ती माता !
तिमी किन भन्दिनौ –
पोथी बास्न पाउनु पर्छ ।
पर्खालहरु चाहिरहेछन्
पोथी बास्न पाउनु पर्छ ।
कसले आज्ञापत्र जारी गर्यो पोथी हत्याको?
कसले हत्या गर्यो पोथीको?
जो
बासेको थियो दिउँसो ।
फूलका डाँठहरु सोचिरहेछन्
बासुन्,
बास्न पाउनुपर्छ
पोथीहरु दीनको ठिक बाह्र बजे
बास्न पाउनु पर्छ ।
भाले र पोथीको
समवेत स्वरले मात्र
यो अर्को भित्ता पनि ढल्न सक्छ ।
(स्रोत : रचनाकारको ब्लगबाट सभार)
