~शून्य प्रकाश~
रुझ्न पाए बर्खेझरी कस्लाई मन पर्दैन र
सुन्न पाए वनकी चरी कस्लाई मन पर्दैन र
सल्लाका ती सुसेली र छहराका छङ्छङ्संगै
छुनुमुनु नाच्ने परी कस्लाई मन पर्दैन र
वसन्त नै भुल्न सक्ने, बेहुलीझैं खुल्न सक्ने
चाँप, गुराँस, सुनाखरी कस्लाई मन पर्दैन र
कुबेरको भण्डार त्यो तराइको हरियाली
झुल्छन बाला थरिथरि कस्लाई मन पर्दैन र
मेरो नेपाल, मेरो स्वर्ग यही पुण्य भूमिसँग
गांसौं माया अजम्बरी कस्लाई मन पर्दैन र
– शून्य प्रकाश
biskatha@gmail.com
(स्रोत : रचनाकारको फेसबुकबाट सभार)
