~देवेन्द्र कुँवर ~
खवरदार नेताहरू संविधान लेख
जनता भर्याङ बनाउने सपना नदेख ।
जनतालाई झुक्याउन अब पाउने छैनौँ
संविधान नलेखे भोट माग्न आउने छैनौँ ।
आजसम्म ढाट्नु ढाट्यौँ अब कति ढाट्छौँ
जनताको मत किन्न कहिलेसम्म आँट्छौँ ।।
खबरदार नेताहरू संविधान लेख
जनता भर्याङ बनाउने सपना नदेख ।
वीरहरूका सन्तान हामी अब अन्याय सहन्नौँ
शोषण, दमन गर्ने यहाँ कोही पनि रहन्नौँ ।
तिम्लाई मालिक बनाउन हामी मर्नु पर्ने
हाम्रो रगत पसिनामा तिमी मोज गर्ने ।।
खवरदार नेताहरू संविधान लेख
जनता भर्याङ बनाउने सपना नदेख ।
बगैचाका फूल हामी तिमी हौ माली
सुगन्ध यहाँ सबको छ, राख्नु सम्हाली ।
साम्राज्य र विस्तारवादको नसुन्नु है कुरा
बगैचालाई टुक्राउन चलाउदै छन् छुरा ।।
खवरदार नेताहरू संविधान लेख
जनता भर्याङ बनाउने सपना नदेख ।
– अर्घाखाँची
(स्रोत : हाँक विक्ली – वर्ष ३२, अङ्क १४ – Feb. 25, 2015 – २०७१ फागुन १३ गते, बुधबार )
