गजल : के हाल छ ?

~गोविन्ददेव आचार्य~

जिन्दगी नसोध् मलाई सधैँ-तेरो के हाल छ ?
घाटामा खरायो, नाफामा कछुवाको चाल छ ।।

हो; फेरियो ! मेरो समय र देश अवश्य फेरियो
हिजो जस्ता थियो, छानामा आज चुहिने पाल छ ।।

हे दसैँ ! तेरा दरबारका दुर्गाहरूलाई सम्झाइदे
गरिबका टाउकामा दशा र आँगनमा काल छ ।।

युगले अनौठोसित गरेछ सायद लोकतन्त्रे खेती !
न त आलीमा बुद्ध न भकारीमा पूर्ण नेपाल छ ।

गोविन्दे ! तँ गोविन्द भेट्दैनस् कहिल्यै भेट्दैनस्
किनकि तेरो मन लोभी र आँखाको दृष्टि दलाल छ ।।

(स्रोत : रचनाकारको फेसबुकबाट सभार)