~नृपेश उप्रेती~ 
१
जगतमा कोही छैन समय भन्दा ठूलो
कमाइ पनि हुँदै हैन संचय भन्दा ठूलो
नलेउ मनमा चिन्ता आफैलाई खान्छ
कुनै रोग हुँदैन मनको भय भन्दा ठूलो
२
मुस्कुराउँदै आएर चल्ने गर्छ साँझमा
तिम्रो यादले मुटु जल्ने गर्छ साँझमा
सुरु हुनु पहिले नै कहाली लाग्दो रात
सराव पिएर नृपेश ढल्ने गर्छ साँझमा
३
रुप रंग र यौवनको अनुपम आवृत्ती हौ तिमी
समयले कहिलै नबिर्सिने त्यो स्मृति हौ तिमी
तिमीलाई पढ्ने हरेक कविहरु यहि भन्नेछन्
लेख्नेले पनि फुर्सदमा लेखेको कृति हौ तिमी
४
अलिकति जान्ने चाह भए रविलाई सोध
त्यो भन्दा बढी चाह भए कविलाई सोध
योग भोग संभोग, के हो त जीवन जगत ?
बुझ्नलाई हामी जस्ता अनुभवीलाई सोध
५
आमाको गाली गर्नु भएको छ राजनीति
छोरीको दलाली गर्नु भएको छ राजनीति
आफ्नो घर लुट्न डाकाको जत्था पठाइ
छिमेकीको रखवाली गर्नु भएको छ राजनीति
