~कृष्ण सिंह पेला~
कति निको मेरो अपी हिमाल हेरी झा
सेती सिरानमी बस्यो शैपाल हेरी झा
दशरथ रे भीमजसा सपूतसूर्ज उदाउन्या
मेरो सुदूरपश्चिमा नेपाल हेरी झा
खप्तड जडीभणार वन, शुक्लाका बरसिङ्या
याँ बेतकोट, घोडाघोडी ताल हेरी झा
श्रीकेदार, त्रिपुरा, मेलौली, मालिका
हजार थान, द्यौल, माणु, झाल हेरी झा
माघी, सखिया, देउसी, भुवा रे हुड्केली
गौरा रे जात देउडा धमाल हेरी झा
घोगा रोटा रे नून, भुइँसाकी बकली छाँच
खाई झा, डुब्क्या फाँणाकी उमाल हेरी झा
काफल, अठन्नी , मौसमी, केला, दाडिम, चूक
हैंस्यालु, किरमडानको कमाल हेरी झा
ठण्णु पानी मूलको अँजुलीमा पिई
पहाडका ओराल रे उकाल हेरी झा
यो साल पर्यटनको हो, नेपाल घुमी झा
सेती रे कालीकी सुसाट छाल हेरी झा ।
