~गोविन्ददेव आचार्य~
छन्द : तोटक
अति निम्न नहोस् अतिसार नहोस्
ठिक जीवन होस् तर हार नहोस् ।।
श्रमले, गुणले भरजन्म जिऊँ
तर वञ्चन वा व्यभिचार नहोस् ।।
दिन-मास बितून् सब औसतमै
अति आर्जन वा व्ययभार नहोस् ।।
बरु ओत मिलोस् सुखले वनमा
पर-पीडनको दरबार नहोस् ।।
सजिऊँ म ढिँडो अनि गुन्द्रुकमै
छलको धनयुक्त भँडार नहोस् ।।
प्रतिविम्बन होस् शुभ सङ्गतको
तर जीवन शून्य, असार नहोस् ।।
गणतन्त्र पुगोस् झुपडी सबमा
अब बेथितिको सरकार नहोस् ।।
– विदुर न•पा• 3 शेरा, नुवाकोट ।
(स्रोत : रचनाकारको फेसबुकबाट सभार)
