~रुकशाना कपाली~
लागाय् हताः न्हापा हे जूगु खः
अय् नं व हे देय नाला
व हे देसय् दुने झीसं अस्तित्व माला
देय् ला मन्त म्वा हे म्वाःल
व देसय् दुन नं हाकनं हाकन्ं हताः जुल
राजधानी जुल झीथाय्
अले हिल झीगु बाय्
गुलिं ला ग्यानां बिस्यूं वन सांगु पुलाः
त्वतावन थःगु थाय्
सुनावन हिति फुक्क
दुनावन छेँ दक्व
छेँय् स्वाने गगं इकु
निभाः मवयाः चिकु
तल बालं त्वःतल ज्या
थां वन व हे “बाज्या”
मनू वल खुसिबाः थें
दक्व च्वन थ्व हे गालय्
थाय् जुल साःगाः थें
तया झीसं इम्त बाय्
मियाः थःगु बुँ, छु धाये मधाये
आः लँ मगात हं
आः बँ मगात हं
आः नयेत्वने याये मगात हं
झीसं छेँ बुँ मियाः झी हे अल्पमतय् लात
जुजु मुजु धाधां झीगु भाय् थन
भाय् जक्क मखु आः बाय् नं थन
आः चीबहाः चीकीन
देगः फुक्क थुनीन
न्हाकननि न्हनिन
बाकननि बाकू थलीन
मरु त्वाः मदइन
पिलाछेँ पिइन
लाछि फुक्क तनीन
बहाः फुक्क थुनीन
गुँ फुक्क पिचुल
फय् यचु मजुल
सास: फिइ थाकुल
खुसि दक्व ध: जुल
न्या ब्यां गन तन गन तन जुल
पूखु दक्व गन
थःगु भाय् छ्यलेमखन
फूच्व आः फुलचोकी जुल
पूच्व आः पुलचोक हं
म्हयपिइ आः रायमाझी टोल
यलय् आः अधिकारी मार्ग
मसिउ झी छु स्वयाच्वना
सखे, खाछेँ कुखुरा घर याइगु पियाच्वना
मस्तयत भाय् मस्यन
बच्छि नेवाःत “बच्छि नेवाः” जुल
झिन्निगू लिपि झनावन
भाय् जुजुं सिधया वन
ज्यालगय् मजू हं झीगु भाय्
ज्यालगय् मजूगु व मजुइकाः बिउगु, पाके मफुपिन्त छु धाये?
सम्पदा फुक्कं तेन्दरं
प्लतिङ फुक्क मेन्दरं
नेवाः भूमिइ पलाः तल
नेवाः पहः थनं न्हङ्कल
थौं झीगु थासय् झीतः हे
झीगु थाय् मखु धाल
छेँ बुँ मियाः गल्ति यात
पस्चाः चायाः छुँ ख्यात
झीसं नं छु धाये मफत
स्व जक स्वयाः छुं याये मफत
नांया ल्यूने जातं जक नेवाः
नेवाः धायेगु चिं हे मदइन
न्हनी थें जुल फुक्क
तनी थें जुल दक्व
आः नं न्ह्यलं मचाः सा
झीगु बँय् झी हे
धू जुइन
झीसं सुइत पाके म्वाःल
थःगु गल्ति भिङ्के माल
थः बःलाः सा मेपिं ख्याये
थथे धायेवं सुइतं ह्यपेमयाय्
झीगु बाय् मेपिन्सं नाल
बाय् नाला काःथें ना मनाः झीगु भाय्
थ्व थाय् छिमू नं खः धाय् स्यने
थाय् जक्क मखु भाय् छिमू नं खः
तजिलजि छिमू नं खः
थथे यानां मिलेजुयाः वने न्ह्यां
आः झी न्ह्यलं चाय्
मगाःउ मचाःउ फुक्क याय्
जिं ला छितः थ्व हे धाय्
सु खनां मग्याय्
हाकनं छ्वासं दनां वय्
महिता फुक्क पनां वय्
थः बुँ म्हालासाला याय्
थः थाय-या हामां जुइ
न्हङ्के बीमखु झीगु सम्पदा
हना तय् झीगु नखः
कत्तर धाःसा जुइमखु
जेनोफोबीक जुइमखु
ई पासें बांलाकां यने
मज्यू फुक्क भिङ्काः यने
अयेनं नेपाल मन्दल नेवाः सभ्यता ल्यङ्कतय् झीगु नेवाः सम्पदा
(स्रोत : झीगु डट कम)
