~जीवराज बुढाथोकी~
कोहि गर्ने नक्कली त्यो, भेषमा बाचा नयाँ ।
कोहि रच्ने स्वांग उस्तै, देशकै राजा नयाँ ।
नर्तकी नाच्छे कसैको, भावभङ्गी चालमा,
गीत उस्तै ताल उस्तै, गाउँछन् भाका नयाँ ।
छैन चिन्ता एक केवल, खाउँ मैं आजीवनै,
डाडुपन्यू हात राख्ने, ती उनै पाखा नयाँ ।
रात पर्दा स्याल जस्तै, गाउँ छिर्ने गर्दछन्,
प्रात आयो उल्लुजस्तै, सुस्त त्यै चाला नयाँ ।
भन्न थाले फरियाको, हुन्छ नाता खास त्यो
चाकरी ले हुन्न बाबै, फेर त्यो नाता नयाँ ।
तीन कोटी आँसु झार्छन्, पुछ्छ कस्ले कुन्नि खै?
नाँच आफ्नै गान आफ्नै, स्वार्थ भो साझा नयाँ ।
बहर: रजज महजुफ
रुक्न: २१२२, २१२२,२१२२, २१२
जीवराज बुढाथोकी
खलंगा ९, सल्यान
हालः घट्टेकुलो, काठमाडौं
२०७२।०३।२४
