~रामशरण महर्जन~
म्वायेत मजि मगागु लँ
न्यासि हुँ, तुला हुँ, ब्वया हुँ,
थहां हुँ, क्वहां हुँ, घ्वाना हुँ
ब्वाय् हुँ, बुलुं हुँ, ज्वंका हुँ
न्ह्यने हुँ, ल्यूने हुँ, कुबिका हुँ
तलय् हुँ, कुने हुुँ, कोथय् हुँ
हाचं गाया हुँ, तिन्हुया हुँ, मतापं हुँ
मग्यासे हुँ, ग्याग्यां हुँ, ख्याना हुँ
खंकः हुँ, मखंक हुँ, सुला सुला हुँ
सत हुँ, लिगं हुँ, सुम्क च्वं हुँ
दँ हुँ, फेतु हुँ, द्यों हुँ,
न्ह्यू हुँ, ख्वः हुँ, सी हुँ
लँ ला छगु मा हे माः
गल्ली हुँ, पीचं हुँ, सी लँ हुँ
लँ दुसा बाँ हे लात
लँ मदुसा दयेका हुँ
मछिं, मज्यूसा स्यंका हुँ
मचाया लँ, बुराया लँ, ल्याय्म्हतय् लँ
हाकिमतय लँ, पियनया लँ, दलालतय् लँ
भिंगु लँ, मभिंगु लँ,
ज्यःगु लँ, मज्यगु लँ, मछ्यगु लँ
मयेकेगु लँ, ययेकेगु लँ, घयेपुय्गु लँ
छेंया लँ, बुंया लँ, द्योया लँ
मनूया लँ, पशुया लँ, भूतया लँ,
नापं वनेगु लँ, बाया वनेगु लँ, प्यपुनेगु लँ
छंगु लँ, जिगु लँ, वैगु लँ
छपू लँ, निपू लँ, प्यका लँ
लँ ला लँ हे खः वये वने यायेगु
ज्याया लँ, खंसवाया लँ, ज्याखुंया लँ
बाथाया लँ, लाताया लँ, ह्वाज्यया लँ
लँ मामां थःहे तं, ज्वीगु लँ गन गनं
तंसां लूसां मागु लँ, न्ह्याम्हं जुईगु व हे लँ
फतले ज्वी, मफय्वं दी, हथाय्पिं फुई
छं स्यू न जिं स्यू, न्ह्यलय् ज्वीला, ज्वलय् ज्वी
याकचा ज्वीला, सकलें ज्वी, खं ला जू हे ज्वी
मनय् ज्वीला, बनय् ज्वीला, मति गज्वग ज्वी
ग्यनां जी ला, गना जी ला, हेका हे जी ला
जुजूं हे लँ लूई, मजुम्हला कोथाय् ज्वी, सकसितं गलः ज्वी
लँ हे खः मनूत च्यः ज्वी, नायः ज्वी, द्यो ज्वी
जन्म ज्वीवं मनूया गुलि गुलि लँ लुई
न्हयाईपुगु लँ, म्हईपुगु लँ, ग्यानापुगु लँ
सःतिगु लँ, तापाःगु लँ
तप्यंगु लँ, बेक्वःगु लँ, त्वादगु लँ
हाय्किगु लँ, न्हिकिगु लँ, ख्वय्किगु लँ
तस्वागु लँ, क्वतासेगु लँ, त्वाथःगु लँ
थह्रःक्वह्रःगु लँ, माथं वंगु लँ, ध्वपःया लँ
ध्याचःगु लँ, धूवःदंगु लँ, वछिंगःगु लँ
तांन्वगु लँ, चिकुसेच्वंगु लँ, किचलंदागु लँ
जूदुगु लँ, झिझ्यांदंगु लँ
पुलांगु लँ, न्हुगू लँ, थौंकन्हय्या लँ
उकिं धिसीलाक पलाः च्वय्केमा
आज्जुई थ्यंकिगु भिंगु खःगु लँ ल्यया ।
२ गुँलागाः ११३७
कीपू ।
