~महानन्द ढकाल~
मेरा झन्डा रङ्ग्याउने रातो दिन सक्दिन म
ज्यानै दिन सक्छु बरु माटो दिन सक्दिन म
रगत र पसिनाले लेखिएको इतिहासको
जतन गर्न नसक्नेलाई पातो दिन सक्दिन म
भाव एउटै नराखेर बिखण्डन रुचाउनेलाई
छाती दिन सक्छु टेक्न बाटो दिन सक्दिन म
जसको जोत उसको पोत हुनैपर्छ संसारमा
हात बाँधि बस्नेलाई आटो दिन सक्दिन म
अति मिठो निकै चोखो विश्व बन्धुत्वको
भक्षकलाई आफन्तको नातो दिन सक्दिन म
महानन्द ढकाल
कोहलपुर -१२, बाँके ।
