~सूर्य चापागाईं~
तिमी जून हौ कि जुनेली तिमी हौ !
कतै पूर्णिमाकी उजेली तिमी हौ !
भयो बाग प्यारो तिमी आउनाले
जसै चिर्बिरायौ जुरेली तिमी हौ !
कढा धूपमा सासको धाप बढ्दा
खडेरी पवनकी सुरेली तिमी हौ ।
तिमी बग्दछ्यौ गीतझैँ यी नयनमा
नदीको नीलो नागबेली तिमी हौ ।
तिमी हाँस्दछ्यौ मञ्जरी पालुवामा
वसन्ती छटाकी चमेली तिमी हौ ।
उषा हौ तिमी प्रात भै साथ चल्ने
सधैँ ‘सूर्य’लाई सहेली तिमी हौ ।
-कुरुले तेनुपा, धनकुटा ।
हाल : काठमाडौं
(स्रोत : काव्यकुञ्ज डट कम)
