~मन्दिरा कोइराला ‘मधुश्री’~
—
नआउनुपर्थ्यो सामु आयौ किन ?
आइ त सक्यौ फेरि डरायौ किन ?
मात्र एक झल्को चिहाउने बहानामा
यी नजरमा ती नजर मिसायौ किन ?
मदिरामा ‘नँ’ थपिएको प्याला हुँ म
व्यर्थै त्यो अधरमा लगायौ किन ?
बेहोसीमा मात्र लाग्दैन रे बात
नपिउँदै मेरो हात समायौ किन ?
‘मधुश्री’मा मधुर बहार नै छैन
सुहागसेज व्यर्थै सजायौ किन ?
– खनार ४, सुनसरी, फोनः ०२५ ५८०३९१
श्रीमती मधुश्रीका प्रशस्त फुटकर गीत र गजलहरू प्रकाशित भएका छन्।
(स्रोत : साहित्यसरिता – माघ-फागुन-चैत-2061 अङ्क ४ )
