~रिजु श्रेष्ठ~
प्यखेंरं स्वया यक्व हे दु मां
अय्नं जिगु नितिं छम्ह हे छ जक ।।
मां मात्र छ हे खः, जिगु जन्मया आधार
रुप छंगु यक्व दु तर छ हे जिगु संसार ।।
छम्ह हे मिसा तर अवतार छंगु यक्व
तर मां हे खः प्रकृतिया सुन्दर उपहार ।।
सकस्या काइगु छंगु हे नां मां
तर परिस्थिति व अवस्था थःथःगु हे पाः ।।
नुगलय् स्वां ह्वइगु जब छन्त खनि
हलिं हे खिउँइगु छ जब तनि ।।
तःधंगु धन, सम्पति, ऐस व आराम
छुं मखु छंगु लुमुगु किचःया सिचुगु ममतासिबें ।।
वाः फय् तान्वः चिकु दक्व सहयाना
बिल मां छं जितः संसारया दक्व सकतां खुसि ।।
मफइगु खना जिं न्ह्याक्व हे याःसां
गुण व बर्णन पुलेगु छंगु थुगु जुनि ।।
मचा निसें ल्याय्म्हं व बुरा तकं
मांया किचः मदुसा जीवन रिक्त ।।
मात्र छगु हे इच्छा जिगु थुगु जुनि
छ हे जिगु जन्मौं जन्म हलिमय् वयेगुया हुनि ।।
छंगु श्रद्धा व गुणया कदर
यायेफयेमा जिं आपालं जीवन सार्थक ।।
छ दःसा जिगु जीवन हे तुयुगु क्वाःगु जः
छ मदुसा जिगु दिं खिमुगु हाकुगु किचः ।।
प्रिन्सिपल, हलिं नेवाः इंग्लिस स्कूल, थक्वाः, येँ
२०७४।५।२६
(स्रोत : नेवाः अनलाइन न्यूज डट कम)
