~दिव्या ताम्राकार~
जि खोना
जि द्वलंद्वः दँ पुलांम्ह खःसां
जिगु सुन्दरता नच्चाम्ह ल्यासेया थें
जिगु रुप स्वयेत
तापाकं तापाकंनिसें मनूत वइ
जिगु वाउँगु मुलय् म्हिती
मिखा जायेक प्रकृतिया अजः उली
जिगु संस्कृतिया मूति त्वनाः
नुगलय् जायेक लसता ज्वनावनी
जिगु सीप, जांगर व कलायात
नुगः ह्वयेकाः च्वछाया वनी
जि खः खोना ।
अय्नं थौं
जिगु अस्तित्वयात संकट वःबलय्
छिपिं सकलें गन दुसुना वना
अय् मनूत !
महिताःतसें जितः
इसाः थिसाः यायेत स्वयाच्वंगु दु
ह्याउँगु सिन्हः स्वरुपगु व संस्कृति
जिगु कपालं क्वतानाः
न्हुत्तु न्हुइत स्वयाच्वंगु दु ।
जिगु म्ह छम्हं
फास्ट ट्र्याक, स्याटेलाइट सिटी, बाग्मति करिडोर
छु छु खः छु छु, देत्तु देतनाः
जितः च्वात्तु च्वायेत स्वयाच्वंगु दु ।
उपिं महिताः तय्सं
जितः स्यानांतुं त्वःतेत स्वयाच्वंगु दु
उफ् ! लुमं लुमं नुगः पम्हुइन
जि खोनाया !
ग्व देय् थुवाः जनता धाःपिं ?
छिपिं गन सूवना ?
जि चिल्लाय् दनाः हालां नं
मताःला छिमिसं ?
अय् सलंसः नेवाः खलः पुचःत !
ग्व जिगु सलय् सः तना बियागु ?
अय् देय्या कवि धाःपिं !
ग्व जिगु घाःयात कविताय् प्वंकागु ?
अय् देय्या बाखंच्वमि धाःपिं !
ग्व जिगु स्याःचाःयात बाखनय् ब्वयागु ?
अय् जःलाखःला बस्तित !
छिपिं छाय् मूक दर्शक !
छन्हु छिमिगु नं पाः मवइ धकाः धाये फुला ?
अझ नं च्यूताः काये मखुसा म्वाल
स्वयाच्वं छिमिसं
जि याकःचां अन्तिम सासः तक
फक्व बल पिकयाः ल्वानाच्वंगु
जिगु लाखः प्यूगु, हि बाः वःगु
अले इतिहास हुयाछ्वःगु !
इतिहास हुयाछ्वःगु !
ने. सं. ११३८ सिल्लागा १०
२०७४ माघ २७
खोना
न:लि साहित्य दबूपाखें खोनाय् जूगु साहित्य गोष्ठीई चिनाखं ब्वनाच्वनागु ।
(स्रोत : झीगु डट कम)
