~मायामितु न्यौपाने~ 
हामीलाई छुटाउन, संसारको वशमा छैन,
हाम्रो भाग्य लेख्न कुनै, अवतारको वशमा छैन ।
जसले जति चाहे पनि, सोचे पनि खोजे पनि,
बैगुनीलाई गुनले मार्नु, उपकारको वशमा छैन ।
बरु भौतिक शरीरलाई, टुक्रा टुक्रा पार्न सक्छ,
संकल्पको हत्या गर्न, तरबारको वशमा छैन ।
दृढ इच्छा शक्ति साथै, पाखुरीको खाँचो हुन्छ,
स्वप्न सत्य गर्न मात्र, विचारको वशमा छैन ।
हिँड्दै जाँदा लक्ष्यमा पुग्न त्यति गारो छैन,
इतिहास आफैं बोल्छ, अखबारको वशमा छैन ।
– वीरगञ्ज–पर्सा
