~श्यामदास वैष्णव~
जीर्ण-शीर्ण खंडहर झैं घर
रोग र व्याधी गन्ध र फोहर
भोका नांगा जनता जर्जर
देखेसम्मन् वास असुन्दर ।। मर्न मलाई डर लाग्छ ।।
रुढी-बूढी अन्ध विचार
द्वेषी भाव र मारामार
क्रन्दन पीडा असत्य चाल
नगएसम्मन् यस्तो हाल ।। मर्न मलाई डर लाग्छ ।।
शान्ति र सुखको बनेर बास
नयाँ जमाना, नयाँ प्रकाश
उन्नत सपना सुन्दर आश
नभए सम्मन् ‘पूर्ण विकाश’ ।। मर्न मलाई डर लाग्छ ।।
(स्रोत : पं. बदरीनाथद्वारा सम्पादित पुस्तक “पद्य-सङ्ग्रह” बाट सभार)
