~दुर्गा शर्मा~
मेचिकाली तराई हिमाल चौकिल्ला हाम्रो देश
फरक जाति, भाषा धर्म फरक नै छ भेष ।
सामाजिक सद्भावमा नै जोडिएको नाता
कोही बस्छौं हिमाल पहाड कोही तराई फाँट ।
जहाँ हामी बसे पनि भए भए जुनै जाति
एउटै वर्ग हम्रो यहाँ सबै हौं नेपाली ।
अन्तरजातीय विवाह र छ्यास्मिस् बसोबास
रूपान्तरण गरौं समाज सबै एकैनाश ।
पिछडिएको समुदायलाई दिउँ अवसर
जातीय सीमा छुट्टाएर हुन्न बराबर ।
केन्द्रीकृत शासनलाई विकेन्द्रीकृत गरौं
टुक्रिन्छ देश संघीयताले यस्को भर नपरौं ।
आफ्नै देशको यथार्थमा निर्णय गर्ने गरौं
इसारामा विदेशीको भर पर्ने नगरौं ।
कोही चाहन्छन नेपालमा जातीय युद्ध भाको
कोही चाहन्छन् सिंगो तराई टुक्रिएर गाको ।
त्यसैले त भारू अनि डलर भित्रीराको
रिजाउन विदेशीलाई संघीयता ल्याको ।
लगाएर जनताको भावनामा चोट
उखेल्दैछन् समाजमा एकताको बोट ।
चिन्नुपर्छ जनताले यिनको सबै खोट
यातिदिउँ शासकको विदेशी यो कोट ।
जुटौं सारा मेचिकाली एकताको मसाल बाली
निश्तेज पार्न देश टुक्राउने सबको चालबाजी ।
(स्रोत : हाँक विक्ली – वर्ष ३०, अंक ३७ – Aug. 7, 2013 – २०७० साउन २३ गते, बुधबार)
