~अमला अधिकारी~
चुलो, चौका खट्प्वालभन्दा माथि उठेन
जिन्दगी चार पर्खालभन्दा माथि उठेन
लेख्नु थियो देश, माटो, समाज लेख्नु थियो
मेरो कलम अनिकालभन्दा माथि उठेन
बाउको जिन्दगी माछा मारेर सिद्धियो
छोरो पनि उही जालभन्दा माथि उठेन
सिन्दूर, टीका, चुरा मैले भनेर के गर्नु
तिम्रो चिनो रुमालभन्दा माथि उठेन
कहिल्यै माथि उठेन मान्छेको भाइचारा
जस्तो कि भ्यागुतोको तालभन्दा माथि उठेन ।
– अधिकारी सिन्धुलीमा शिक्षण पेशामा आवद्ध छन्। उनका ‘आगो’,’अमला’ र ‘आरन’ गजलसंग्रह प्रकाशित छन्।
अमला अधिकारी,
सिन्धुली
