~रिजु श्रेष्ठ~
धायेतला धाइगु नेवाः छवाः
जुइबले नेवाःत हे स्ववाः
धाइगु ‘भाषा म्वासा जाति म्वाइ’
नेवाः नं नेवाःयात हे लिफः स्वइ ।
हलिमय् बिस्कं म्हसीका नेवाःया
अय्नं धात्थें झीसं म्हसिके मफु झीगु देय्यात ।
भाय् तजिलजि व लिपि स्व
अन्तर्राष्ट्रिय लिखित जुया च्वं
Traditional मखु Modern या पक्षय् झी
नेवाःकरण मखु नेपालीकरण सकलें ।
थवं थवय् ल्वापु मखु स्वापु तये धाइ
जुइबले सकस्यां जुइगु ब्यवहार थः कतः ।
नेवाः मुने व दने, झी झी जुइगु नारा
तर, छम्ह नेवाःया नितिं मेम्ह तंगु परम्परा ।
जुइमाःगु सकल झी मुक्कं नेवाः
याइपिं पार्टीया सम्झौता व सेवा ।
आश्वासन जक हे जुल, नेवाः झी छप्पं जुइगु
झी झी दया नं सुयात सुं मदुुगु अवस्था ।।
बुलुहु ह्याँउनिभाः लुइ, इलं हिउपाः हइगु आशा ।
सचेतना वइ अले सकलें दनिगु भरोसा ।
आः मखुसां छन्हु अवश्य झी नेवाः दनि जुइ
आशा दु अवले तक झी तसकं लिमबाइगु हे खइ ।
व्यक्तिगत बिचाः व फुटयात थौं गन खः अन हे त्वःताः
मुनेगु सकलसित जि छम्ह नेवाः मिसाया इनाप ।
प्रिन्सिपल, हलिं नेवाः इंग्लिस स्कूल, थक्वाः, येँ
२०७४।५।२६
(स्रोत : नेवाः अनलाइन न्यूज डट कम)
