~कृष्ण वस्ती~
जात होइन चिन्तनको, कुल राम्रो लाग्छ ।
फक्रिएका सबैथरी, फूल राम्रो लाग्छ ।।
घामछाया बराबरी, जिन्दगीको माया ।
बाँडी-चुँडी सँगै भोग्दा, शूल राम्रो लाग्छ ।।
रातोदिन मेरो मन, तिमीतिरै जान्छ ।
तिर्खालुका लागि सँधै, मूल राम्रो लाग्छ ।।
चन्द्रमाझैं चारैतिर, घेरिएर खुल्दी ।
तारामुखी दौंतरीको, हूल राम्रो लाग्छ ।।
खानीखोला-वारि गाउँ, पारि पर्यो बेंसी ।
तिम्रोसाथ तर्ने मलाई, पुल राम्रो लाग्छ ।।
नाच्दानाच्दै देखी मलाई, गल्ती कतै गर्छ्यौ ।
मन परेकी मान्छे पर्यौ, भूल राम्रो लाग्छ ।।
वस्तीभरि फैलिएर, बतासमा उड्ने ।
गोधूलिमा तिम्रोसाथ, धूल राम्रो लाग्छ ।।
(स्रोत : रचनाकारको फेसबुकबाट सभार)
