~नविनप्रकाश श्रेष्ठ~
मनूतय् नये पित्यायेवं
चा न नयेगु स्वये य:
ल्वहँ न नयेगु स्वये य:
धलय् बा: वगु ल: न त्वनेगु स्वये य:
गथे
स्वस्थानिया बाखनय्
गोमा बमूनिया नये पित्या बलय्
नयेगु तातुनाः खुसिइ वान्छ्वया त:गु जा
जा चा जुल चा नये त्यन
चा नौ जुल नौ नये त्यन ।
मनू तय नये पित्यात कि
न्ह्यागुं नये मालिगु जुयाच्वन
गथे युद्धय्
बर्माया जङ्गलय मनूया ला
वा
सिमाया हाग: वां वां न्यायेत युद्ध
यानाच्वन
गथे दरवारमार्गया डस्टबिनय्
वाँ छ्वया त:गु नसा नयेत युद्ध यानाच्वन
मनूत छुं मिइगु मन्त कि
थ:थिति त मिइगु जुयाच्वन
गथे गामं मिया हल
चटक वा जादुई मस्त
गथे कोठीइ म्हयाय् मस्त
थ:थिति मिइ मफुपिन्सं
थ:त मिइगु जुयाच्वन
गथे गेष्ट हाउस व लजय् मियाच्वन
ल्यासेतयसं जोवन
थगु जलस्येँ व हि मियाच्वन
अस्पतालया लुखाय्
जिमि बाज्यां नं मिल
स्वपी बुँ
छपीया ध्यबा बिल राजनितियात
मेगु ध्यबा निनि व बाःया ब्या भ्वय् न्यायेकल
जिमि बाः नं मिल निपि बुँ
छु दँ लिपा
व ध्यबां जिमित कयता पुजा यात
मेगुध्यबां न्यात छग: मिनिबस
जिमि ककां जिमिसं हे
मसिइक बुँ मिल
फर्जी भ्वँ दयेका
फर्जी भ्वँ थें हे व म्यूगु धेबा छुयात
आ तक जिमिसं मस्यू ।
जिमिगु बुँया ध्यबा तुगु राजनितीई
आ नीति मन्त राज जक दनि हँ
भ्वय ला ब्या भ्वय कुन्हु सुथ हे सा जुई धुंकल
बुँया धेबां न्याना चिना ब्यूगु कयता
पिति पिति अबले हे वये धुंकल
अा जिके कयता न मदु
बुँया धेबां न्यागु मिनिबस
टायर पन्चत जु थें ध्वस्त जुई धुंकल
आ जिमिके जक मखु जिमिगु त्वालय् हे
सुईके मदये धुंकल
बखरिइ वा, डोलय बुँ
कालय् कयता व ख्वालय् न्हिलासु
आ जिके जक मखु
जिमिगु त्वालय न्याये दैगु जुल
निग: जल्लासेँ
गाक्क हि
केँहेँ पिनिगु जोबन
छु याये !!!!
थुली जुलं न
जिमित सुनां बिचरा मधा
जिमित जिमिसं बिचरा मधा
आ जिमिसं जिमिगु त्वालय्
जल्लासें, मनूया हि
व केँहेँया जोबनया पस:
मचायेकुसे गाई मखुत
जित: साप चिन्त्ता जुया च्वन
(स्रोत : झीगु डट कम)
