~सजल महेश आचार्य~
(१)
एकैछिन तिमी विना रहुँला ममा धीर छैन
तिमी नै छौ सम्झनामा अरु केही पीर छैन
हावासँग पनि इर्ष्या लाग्छ तिमीलाई स्पर्श गर्ने
तिमी नजर परेदेखि तनमन केही थिर छैन ॥
(२)
आफ्नो यात्रा, आफ्नै शुभकामना थियो
रोजेको बाटो आफ्नै प्रीय सिर्जना थियो
कहाँबाट कालो बादल आयो आँखा छोप्न
जून छोइ जून हुने प्रवल चाहना थियो !
(३)
जेनतेन गुज्रिएको जर्जर जीवन भो
पानी छैन तिर्खाउँदा, हर्हर जीवन भो
कसैसँग कुनै गुनासो छैन आज पनि
आफैसँग झर्को लाग्ने कर्कर जीवन भो !
(स्रोत : रचनाकारको ब्लगबाट सभार)
