~निर्मोही व्यास~
गोटी षड्यन्त्रका चाहे जति चालिसियोस् प्रभु !
खसी घोर्ले, सिसी झिल्के जति ढालिसियोस् प्रभु !
घाम-जून हजूरैका हुने पेवा गए दिन
नौ लाख पिल्पिले तारा जति बालिसियोस् प्रभु !
सेतो पार्न त गाह्रै छ ‘कालो धन’ मरे पनि
‘पुरस्कार’ भनी चारो जति फालिसियोस् प्रभु !
चल्दैन अब क्यै दैया सत्यलाई दबाउन
अल्सेसियन मापाका जति पालिसियोस् प्रभु !
विद्रोही ‘व्यास’ लाई यो किन खोज्नु फकाउन ?
आफ्नोे विवेकको भ्वाङ बरु टालिसियोस् प्रभु !
(स्रोत : ‘बोधिवृक्षको छायामा’, कविता–सङ्ग्रह—२०६९ – पृष्ठ ६४)
