थारू भाषी कथा : जुनीक जीन्गी

~निशा चौधरी~

“मै वेश्या नै हुँ । मै कौनो फे वेश्यालय खोल्ल नै हुँ । मै एक आदर्शवादी पवित्र नारी हुँ । मै पैसा लेक कौनो फे पुरुष मनैनसे यौन व्यापार नैकर्ल हुइटु । मै यौन व्यापारी नै हुँ ।” यी वाक्य कोनो एकठो साधारण मनैनके आघ बोल्ल नैरही । वेश्याहुकन खोज्टी नेङ्ना यौन प्यासी हुकनके सामने कलरही मोर संघरीया जुनी ।

पुलिसथानक एकठो कोठम आँजरपाँजर पुलिसनसे घेरल एकठो कुर्सीम बैठल रही ऊ । सक्कु पुलिसनके नजर जुनीकम रहीन । यकर आघका बोली कैक सक्कु पुलिसनके कान ठार रहिन् ।

फेन जुनीक उप्पर प्रश्न बर्सलिन, “तुँ वेश्या नै होक का हुइटो त ?” हजुुर मै साधारण एकठो गरिब परिवार जन्मलक लवण्डी हुँ । मै वेश्यावृत्ति कर्ना मनैया नै हुँ । मै वेश्याके परिभाषाके भित्तर पर्ना नारी नै हुँ । मै वेश्या हुइबे नैकरुँ । हुँकार बात हकिम्वा ध्यान देक सुन या निसुन उहिन पता नैरहिन । लेकिन ओकर आँखी एक टक होक हुँकाहार गुलाबी धेब्रम अट्कल रहिस् । उह ब्यालम भर जुनीहन आपन सुन्दरताम दानदान आत्मगौरव भर लागटहिन काकर कि पुलिसथानक हाकिम्वा फे मोर धेब्रक मन्त्रमुग्ध हुइल बा । लेकिन उहिन हन बरा रिस लागटहिन व लाज फे ।

धेर से धेर आरोप प्रत्यारोप लगैल जुनीक उप्पर केउ कह सजाय देहही परी । जुनी एकघरीक अक्वाइल भक्वाइल होगिली । असीन बात सुनक सायद उपरका बद्री फे छिदिर बिदिर हुइल हुइ । सायद ओकर बात सुनक एकठो निर्दोष नारीक उप्पर लगैटि रलक असीन लाञ्छना सुनक सारा धर्ति माता फे रुइल हुइँही । वातावरण सन्नाटा रह जुनीहन ओत्थेह घेँचा काटक आत्महत्या कर्नास मन लग्लिन । यकर दोष असीन लाजलग्टिक अपशब्द प्रहार करुइया पुलिसनके उप्पर लगैटी ।

उ सँुकसुँकइती रुइ लग्ली । हुँकाहार आँसले सलके सोब्ला फे भिज लग्लीन । विचारी जुनी रोइ कील । जीन्दगीम पहीलाबेर वेश्याके विशेषण पाइल रही । ना त कुछु बोल स्याकटही ना त दिमागम कुछु शब्द बा कना असक लागटहीन । पाछ जुनी तरीक हिम्मत निकारक आँखी लाल पर्ति आपन सत्य बात बोल्ली । मोहन कना मनैया जौन जुनीक संघरीया रह अक्क कक्षम पहर्ना । उ गाउँक लग्गहक बजारम दोकान खोल्ल रह । जुनी बेराम हुईलक ओरसे कुछ दिन स्कुल नैगीली । मस्तरुवक लिखाईल कापी लेह गीली व परीक्षा फे लग्गह अइलक ओरसे सल्लाह लेह गिली । उह बहानम मोहन जुनीहन नशालु चिज खवाक जुनीक लरम आङ पक्रल । जत्रा हार गुहार मँङलसेफे केउसुुनुइया नै रह, ना त डवार खोलक भाग सेक्ली । जत्रा उम्क खोज्लसेफे अन्तिमम उ शोषित होक छोर्ली विचारी जुनी । तब्ब कहाँ से पुलीस आगील छापा मार । ओट्ठेसे जुनीहन पुलिस थानम लैगिलीन लेकीन मोहन भाग गिल । असीक जुनी आपन सँघरीयसे दिनहक बलात्कृत हुइली । व पुलीसनके फन्दा म परगिली ।

उ नारी हुइलक ओरसे बलात्कृत हुइली । पुरुषहुक्र अपवाद बाहेक कहुँ फे बलात्कृत नैहुइठ । लेकिन नारीहुक्र बलात्कारके पिडा पैना पहुरा सित्तैमा पैल बाट । उहिन सक्कु नारी जातिनहुकन असीन कुदृष्टि ले हेर्ना सक्कु पुरुषहुकन सरप्नास मन लग्लीन । व राष्ट्रभक्तके झुठ्ठा नाटकम नाटक कर्ना सक्कुहन तानक एक एक झाँपर मर्नास मन लग्लीन । लेकिन जुनी विवश रही कुछ कर सेक्ना हालतम नै रही ।

पुलीसथानक हकीम्वा यी बात बाहेर नैजाइ कैक जुनी से ५ हजार घुस फे माँगल । लेकीन पैसा जुटाइ नीसेकक जुनी फेन दोस्रो एकठो पुलिसथानक हकीम्वसे बलात्कृत हुइली असीक मोर सँघरीया जुनी, तिन दिनम दुइठो राक्षसीनसे शोषित हुइली ।

आजसे पैल्ह करिब १ वर्ष आघक घटना हो । दश्या फे लग्ग लग्ग आइल रह । घटस्थापना अइना फे एक हप्ता बाँकी रह । सख्या नाच सीखुइया भर्खरिक लवण्डा लवण्डीन मन्द्रा व मँजीरा लेले रातभर भर सख्यक नाच सिखै । जुनी गरिब घरक छाइ हुइलक वरसे दिन भर काम करक मिच्छाइल जीउ हालिसे सुतजाइ । बिहान हुइतिकिल गाउँक एकठो सहुवक खेत्वम काम करी । धानम जामल धर्रा जरी तीर से उखर्ना । सद्द हस उ दिनफे जुनी व जुनीक दाई खेत्वम गिल सँगसँग उह गाउँक कैलाश कना लवण्डा फेन रह जोन जुनीक उमेरके रह । कैलाश फे एक गरिब घरक लवण्डा रह । उ पह्रल लिखल भर नै रह । उहमारसे त जुनी व कैलाशके बिच्चम पहर्ना विषयम कहिक कहुवा हुइन । उ दिन फे झगरा असक होगिलिन दुनुजहनके । दाई कै चो चुप लागो चुुप लागो कैक कहलरही । उह ब्यालम जुनीक दाई पानी लेहे चलगिली । गाउँसे खेत्वा लगभग आधा घण्टा दुर रह ।

असोजके महिना रह । फुट्ना ब्यालम धानक ब्वाँट फे ध्याङध्याङ होगिल रह । फेन तराईके मेर्वा फे त चाकल चाकल रह ओम्नह अह्रर व भर्ठर लगाइल रह । लगभग ४÷५ फिट होसेकल रह मनैन छेक्ना । कैलाश जुनीक भिजल सुरुवाल जौन हुँकार जाँघम चप्कल रहीन उह हेर्तिरह । ऊ आपन मन थामक जुनीसे कुछ माँगल “जुनी एकचो देऊ ना” जुनी कैलाशका माँगता कना कुछ नै बुझ्ली । पाछ उ खुलक कहल जुनी एकचो आपन शरीर छुअ देउ ना ? का माँगता कना बात जुनी मजासे बुहुझ गिली । जुनी गरियाई छुट्ली । ओकर बोली एकठो छोट लर्का मिठाई खाईकलाग दाईबाबनसे पैसा मांगहस रहिस । लेकिन हुँकार कुमारीत्व एकठो मिठाई नैरहिन जौन ऊ मँङतिकील मिलजिना व रुइटिकिल दैदेना । जुनी मजासे सम्झाइलग्ली । एकघरीक रहिक कैलाश स्वाँ स्वाँ कर्ति भुखाईल गिद्रा असक जुनीक सक्कु लुग्गा खोलदेहल व जुनीहन ऊ बलात्कार करल । अत्रा सोझ लवण्डा असिक करी कना जुनी सोच्ल फे निरही । असिक जुनी पहिला चोटी कीहुसे शोषित हुइली । जुनी बलात्कारीहन छोर्क घर ओर लग्ली ।

अह्ररके बोँट हन दुई फर्का पर्ति मेर्व मेर्व न्याग लग्ली अह्ररीक पत्यले चिमोठ हस लागिन । पौलीम चप्पल लगाइलमफे दुब्बक काँटा गरहस लागीन । गम्ह्राइल धान फे बयाल आक हिल त खिझ्वाइहस् लागीन । समाज के थन बतादेम कैक अँङग्री उठाईहस लागीन । उप्पर उर्तिरलक बद्री फे मै साक्षी बाटु कहअस लागिन । गोरम हात्तिपाईले रोग लागलहस लागीन । हूँकार आँखिक आघ पर्ना सक्कु दृश्य हुँकार शत्रु हुइट कना हस लागिन । का का सोच्ती सोच्ती ऊ आपन घरक डग्रा सरासर बहै्रती रली । घर जाक लाहाखोरक ऊ खत्यम सुतल रही रात फे होगिल रह । ठिक्क पर दाई फेन आगिली । दाई पुँछ्ली “का हुईटा ?” अत्रा कति किल जुनी दाईहन उँक्वार भर पकरक रुई लग्ली । व सक्कु बात दाईक ठे बतादेली । दाई फे छाईक यि हालत देख्क रुइ लग्ली । दवाई लेह जाइटुँ कैक दाई काल पंचायत बैठइना जानकारी देक अइली । सक्कु जे पता पैल कि जुनी कैलाशसे बलात्कृत हुइली । जुनी फे कैलाशहन चाहतही ताकि कोई फे पुरुष कबुफे किहुहँ असिन नाकर । रात बितल ओजरार हुइल गाउँम जुनीक व कैलाशके हल्ला रह । बरघरीयक घर अङनम सक्कु जे जुट्ल । जुनी आपन उप्पर हुइल अत्याचार सक्कु बतैली । लेकिन केउ फे हुँकार बातम विश्वास नैकर्ल । झन जुनीहन दोष लगाईलग्ल । कैलाश असीन कर नैसेकि, कैलाश बरा सोझ लवण्डा हो कह लग्ल । कैलाशके पक्षम बोल्ना मनै धेर होगिल । कैलाश फे उहाँ झुट्ठा बात बताईल । जुनीक मनम बरा जोरसे भुइँचाल आइहस लग्लिन । ऊ कलि का जे एकठो सोझ लवण्डा केक्रो बलात्कार कर नैसेकि ? काजे गरिब मनै न्याय नैपैना ? झन हुँकार प्रश्न मनैनके लाग खिस्सा बन्लिन । हुँकाहार बातम केउफे विश्वास नैकर्लिन । पंचायत म कोइ फे जन्नी मनै नैहुुइलक ओरसे जुनीक वेदना कौनो पुरुष मनै नैबुझ्ल ।

लवण्डीनके जीन्गी म सबसे घिन लग्टीक काम कलक आपनहन परपुरुष से जबरजस्ती करणी कर्वा पैना हो । जुनी आज बलात्कृत फे हुइली व वेश्या फे कह्वा पैली । असीन परिस्थितिम दबल हुँकार जिवन कत्रा कष्टकर व उराठ लग्तीक हुइलीन कना मै कौनो शब्द म बताइ नैसेकम ।

जुनीक दोस्रा घटना फे महिन मजासे याद बा । हो मोर सँघरीया जुनीक जीन्गीहन तहस नहस हुइल घटना हन मै कसीक बिस्राइ सेकम जे । पहिला घटना के दुई महिना पाछ अर्थात दश्या व देवारीक पाछ जुुनीक दिदी आपन सस्रार से झगरा करक आइल रही । जुनी मधुर दियक ओजरारम पह्रतही तब जुनीक दिदी घरम रुइटी पौली टेक्ल रही । जुनीसे दुई वर्षककिल भारी हुँकाहार दिदी वास्तवम दिदीक नातासेफे सँघरीयक नाताम धेर बाँधल रहै । जुनीक दिदी जुनीहन उँक्वार भर पकरक झन रुइलग्ली । पाछ जुनी का हुइटा कैक पुछ्ली । दिदी सुँक्सुँकैती बताइ लग्ली । “पैल्ह गर्यइना किल मनैया आज तोर भाटु महिन एक्को नैमजासे पिटल ।” जुनी कली काकर पिट्ल त ? “भोजम साइकिल, घरी, व टिभी दाइजो नैअन्ल्या कैक पिटल । दाइजो नैआनल जन्नी हन घरम नैधारम कहठ घरमसे निकर कि निकर कहठ । बिहानी से पिटता । ”

दिदीक यी प्रश्नके जवाफ जुनी का देह सेकही जे ? जब हमार देशम जो दाइजो नामक रोग सक्कु युवा हुकनम गँन्ज्रल बा । दाइजो प्रथाके विरोध करपर्ना शिक्षित वर्गहुक्र झन धेरधेर दाइजो के माग कर्ठ । झन यी ब्यालम अशिक्षित हुक्र मँङना कौनसे लौव बात रह जे । जुनीक पारिवारिक अवस्था कसीन रहिन कलसे औरक खेत्वम ज्यालादारी, बेगारी नैकरल दिन भुँख्ल सुत पर्ना कथा अप्नहुक्र जानसेक्लबाटी । हुँकार परिवारके पैसालेक साइकिल, घडी व टिभी किन्ना कलक जोन्ह्यम पौली टेक्नाहस रहीन । कुछ पाछ दाइ कली “मोर दुख्यारी छाई आज खैलसे काल का खैना कना दोसाँधम अल्झल मोर जीन्गीसे तुहीन घडी, साइकिल व टिभी किनक देह नैसेकम । बरु हुइ कलसे १० वर्षक भैया भारी होक कमाक देह सेकी । मै देह नैसेकम । बरु ऊ सामान बिना घर नैजैबे कलसे नाजा यहैँ मोर घर बैठ ।” सक्कुहन के सल्लाह अनुसार दुई दिन जुनी फेन आपन दिदीहन भाटुक घर पठाईगिली । भैया पाछ कमाक ऊ सामान दी कना बात सन्देश लेक ।

जुनीक दिदीक भोज एकठो मध्यम परिवारम हुइल रहीन ना त गरिब ना त धेर धनी । एक बिघा खेत्वा रहीन व एक कट्ठा तिना खैना जग्गा । आकुर कना हो कलसे जुनीक घरक समस्या समाधान कर्ना हुकहनके आर्थिक अवस्था सक्षम रहीन । टिभी, साइकलि व घडी किन्ना क्षमता त हुकहन ठे रहीन । भाटुक घर पुगटपुगट दिन फे बुर हस होगिल रहीन । घरम दिदीक ससुइया भात पकाइतही । ओट्ठह भाटु फे आगी तापतहै । जुनी आपन भाटु व भाटुक दाई हन सम्झाइलग्ली । “मनै मनै हुईट । तुह्र फे मनै हुइटो हम्रे फे मनै, हम्रे समाजम बैट्ठी । मनै सर्वश्रेष्ठ प्राणीम यी कारणसे पर्ठी कि मनै भावना, अनुभव, दुख, सुख बुझ्ठ । यदि हम्रे और मनैयक दुख सुख नैबुझब कलसे हम्रे पशु हस हुजाब । आपन क्षणिक स्वार्थके लाग हम्रे औरक मनैन हन रुवाब कलसे हम्रे सद्द दुख पैबी । यदि असीक काम कर्बी कलसे हमनहन जन्म देना भगवान फे रिसैही ।”अत्रा बात सुनक जुनीक भाटु व दाइ कुछु फे नै बोल्ल । भात खाखुक आपनआपन कोन्टीम सुत चलगिल । जुनीफे एकठो कोन्टिम सुत गिली ।

बिहान हुइल । जुनी भाटु हन सम्झाइकलाग भाटुक पाछ पाछ खेत्ववर गिली पुसके जार सिरसिर ओम्नह बरा जुर बयाल बहतह जुनी उ बयाल महसुस करटही । दुनुजे सालीभाटु गहुँक मेर्वम बैठक बात बताइटहै जुनी दिदीसे दाइजो नामङहो कैक सम्झाइटही । उह ब्यालम बिच्चमसे चटाकसे बात काट्क जुनीक भाटु कहल, “आपन दिदीहन महिनसे बचैना तुहाँरठे एकठो किल उपाय बा ।” जुनी पुँछ्ली का उपाय ? भाटु मनैया कलिन महीनसे एकचो रात बिताऊ ! यी वाक्य सुनक जुनीक छाती फुटहस लग्लीन, कलेजा फाट हस लग्लीन, छँप्रम से गिर हस लग्लीन । दगुर्ती घर वर लग्ली । घर पुग्नासे पैल्ह जुनी आपन आँस पोँछ्ली । एक ठाउँम बैठक खोब रुइली जुनी । दुई महिनक आघक बात सम्झली । भलभाक ऊ कैलाशके भुँर नैबोक्ली नै त यी ब्याला जुनी ढिँह्रार रती । आपन भाटुक पापी बोली सुनक जुनी आधा घण्टासम रुइली । पाछ शान्त शरीर बठैना मन लेक दिदीक घर पुग्ली । अँङनम पुग्तीकिल दिदी पुछ्ली “का कलै तोर भाटु ?” जुनी हन यी प्रश्न तिस्लोर काँटा असक गर्लीन कि खै कसीक कहीहीँ । “दिदी तोर थरुवा महीनसे एक रात माँगल । दाइजो त एकठो बहाना किल हुइस, वास्तविक इच्छा त महीनसे रात बितैना बातिस । तोर थरुवा पापी बा । स्वार्थी किल नाई राक्षस हो ।” यी बात जुनी मनम बुज्जा लगालेली । कना आँट नैअइलीन । सत्य बात नुकाक झुँट बोल्ना ऊ बेला दिदीक व जुनीक हीतके बात रहीन । “तोर थरुवा बरा जिद्दी बा, दाइजो नैलेक नैछोरी । जत्रा सम्झैलसेफे नैमानल । आब तैँ अप्नह सम्झाइस मै त घर जाइतु ।” अत्र कती जुनी आपन घर वर लग्ली । घर जाक दाइक ठेफे झुट बोल्ली । जात्तिक बात फे दाईक ठे कहनैसेक्ली । कहीँहीँ फे कसीक की दाई तुहाँर दमड्वा महीनसे एक रात मँङल बा ।

जुनीक एस.एल.सी परीक्षा फे लग्गह आगील रहीन । मन नैलागक फे पहर्ना प्रयास करी । एक हप्ता बितल । भाटुक काकक छावा जुनीक घर एक्लाग स्वाँस्वाँ फ्वाँफ्वाँ कर्ती आइल व कहल, “जुनी, भौजी तुहीनहन आब्बह बलैल बाती । हमार घर चोलो हाली नैजाक नैहुइना बा । ऊ लवण्डक बोली डर लग्तीक रहीस ।” जुनी घनघन पुछ्लसेफे नैबताए पाछ बतैम कह । जुनीक मनम ख्याल अइलीन की कहुँ पापी भाटु दिदीहन रक्तरोहुन त नैपर्लहो । अस्त अस्त बात मनम लेक ओक्रे साइकलम बैठ्ली । पुस महिनक जार गहुँ फे बराबरा होगिल रह । मनै नीदेखजीना कुहीरा । खेत्वक डगर नहरी नहरी साइकल चलैती चलैती एक्लाग साइकल रुकल जुनी साइकल मनसे उत्रली । पाछ से च्यापसे केउ जुनीहन पकर्लीन बीलिटक पाछ हेर्ठी त हुँकाहार भाटु । जबरजस्ती जुनीक लुग्गा दुनुजे मिलक निकार लग्ल । दुई जहनके आघ जुनीक कुछु बल नैलग्लीन । जुनी आपन राक्षस हस भाटुसे बलात्कृत हुइली । भाटुसे होक भाटुक भैया से हुइली । जुनीहन आपन जीन्गी ओराइलहस लग्लीन । ना जीअ सेकी ना मुअ सेकी । असीक मोर सँघरीया जुनी दिनहक जो आपन भाटुसे बलात्कृत हुइली ।

जुनीहन आपन जीन्गी जीना बेकार लागलग्लीन । चारुवर अन्धार, ना मनम कोनो जाँगर ना उत्साह । आपन भाग्यहँ सरापलग्ली । कै चो जुनी मुअ फे गिली लेकीन घरम बुह्राइल दाई व भैया समझक घुमक अइलक मनैया हुइटी । काहाँ जाउँ केकर ठे जाउँ न्याय माँग कना बातम ऊ सद्द भौतर्तीरली मोर सँघरीया जुनी । पुलीसथानम जाउँ कलक उहाँ पुलिसनसे शोषित हुइली । पँचायतम बलात्कारीहन सजाय देना ठाउँम उल्ट अप्न दोषी हुइली । आखिर जुनी कसीन लवण्डी हुइ जे कहुँ न्याय नैपैना का जे गरिब मनै न्याय नैपैठ ?

कुछ महिनक बाद जुनी दुई जिउ होगिली । गाउँ समाजम सक्कु जे खिस्सि कर लग्ल । बिन थरुवक ढिँर बोक्राखल कैक । जे हो जे थुक लग्ल । गाउँम करीक मनै जुनी हन गाउँ निकाला कर लग्ल । जुनी जात्तिसे अक्हले पर्गिली । हुँकाहार दिदी लर्का गिराई कलीन लेकिन जुनी काजन काजे नैगिरैली पैनास मन लग्लीन । व कुछ महिनक बादम जुनी छावा लर्का पैली । जुनी आपन लर्कक छोटछोट आँखी, हाँत, ग्वारा, मुँ सक्कु बरा घट्गर से हेर्ली पाँच महिनम पाँच जहनसे बलात्कार हुइलक बलत्कारीनके छाहीँ आपन लर्कक म देख्ली जुनी । लेकिन कौन बलात्कारीक हो कना जुनी पता पाई नैसेक्ली ।

सुन्ठु जुनी आब ऊ ठाउँम नैहुर्ईटी कहुँ दुर गैरली आपन लर्कहन लेक । हुइना त अन्याय, अत्याचार, शोषण हुइना ठाउँम जुनी कसिक बैठ सेकहीँ जे । उह बलात्कारीनहन सजाय, अप्न न्याय व आपन लर्कक बाबक नाउँ पाइकलाग जुनी नेतनके शहर काठमाडांै पुगल बाटी । का लागठ अप्नहुकन जुनी आपन लर्कक बाबम नाउँ, अप्न न्याय व बलात्कारीहन सजाय देहसेकहीँ ? का हुँकार बात केउ पत्यइहीन ? का उहीन केउ साथ दिहीन ?

जुनी आज पाँच महीनमन पाँचठो बलात्कारीनसे बलात्कृत हुइली । हुँकार जबरजस्ती करणी हुईलीन । अत्याचार व शोषणम जिअल नारीहुक्र सद्द आँस पिक बाँचल रठ कलसे शोषण करुइया पुरुषहुक्र प्राय होटल, भारी भारी रेष्टुरेन्ट महँगा महँगा जाँर ढोकक मोज कर्ठ । असिक जुनी जसिन पिडितहन झन आँस देना काम जौन पुलिस प्रशासन म हुईल ओकर कब्कु जुग फे समर्थन करे नैसेक्जाई । विरोधके आगिसे जराई पर्ना असिन प्रशासनके अधिकारीहुकनके व्यवहारहन भुज्री भुज्रा पार पर्ना पिडित हुकनके हाँत सद्द लुल हुइल रहठ । काकरकी हमार समाज ओस्त बा । यहाँ यी देशम पिडित जन्नीनके कथा फे लगभग जुनीक हस हुइहीन बाटिन व शायद रहुइया बाटिन । लेकिन ना हुईस व नाहुईन यी मोर कामना बा ।

निशा चौधरी
नयाँगाउँ ४ बर्दिया
हाल :– कीर्तिपुर , काठमण्डौ

(स्रोत : रचनाकार स्वयंले ‘Kritisangraha@gmail.com‘ मा पठाईएको । )