~दिनेश अधिकारी~
पहाडमा जाडो बढे, तराईले सेक्नुपर्छ
आँधी आए तराईमा, पहाडले छेक्नुपर्छ
हैन भने देशभक्ति छैन हाम्रो छातीभित्र
माटोलाई चोट लाग्दा मुटुहरू रुनुपर्छ
बाँडीचुँडी खाऊँ भन्छ, फाटे मन सिऊँ भन्छ
विपत्तिको ठेस लागे साझा आँसु रोऊँ भन्छ
पूर्वतिर पैह्रो जाँदा, पश्चिमले जुट्नुपर्छ
दक्षिणका तिर्खाहरू उत्तरले मेट्नुपर्छ
हैन भने….
अभावमा यौटै छाता दुइटाले ओढूँ भन्छ
उजाडिए एउटा घर सबै मिली जोडूँ भन्छ
भन्ज्याङको भोको पेट मधेसले भर्नुपर्छ
विघ्न परे फाँटलाई लेकहरू झर्नुपर्छ
हैन भनेँ….
शब्द : दिनेश अधिकारी
सङ्गित : आलोक श्री
स्वर : स्वरूपराज आचार्य
एल्बम : देशको गीत
