~गोविन्दप्रसाद ढुङ्गाना
भैगो, जन्म गरीबकै सुकुलमा होस्, किन्तु त्यो शुद्ध होस्
कोरोस् अङ्गहरु परन्तु तन यो अत्यन्त साह्रो बनोस्,
आउन् कष्ट करालरुप सहसा कुल्चून् सबैले, तर –
छाती यो नफुटोस् विशाल कहिल्यै थामोस् सहोस् केवल ।
फैलोस् बुद्धि सुकर्मकै तरफमा, यो चित्त एकाग्र होस्
आँटेमा पर जन्ममा फल पनि इच्छा गरेको फलोस्
यै नै साहसले म यो जनममा साहित्यको खेलमा
साथी एक बनूँ प्रसिद्ध कविको नेपाल उद्धानमा ।
खैलौनाहरु बुद्धि-खेल घरमा राखेर हाँस्तै मरुँ
आर्को जन्म लिऊँ म फेरि पनि यो नेपालमा नै, तर-
पैलो यो जुनिको कुराहरु सबै संझूँ नविर्सूँ, अनि
खेलौनाहरु ती झिकेर अघिका रोऊँ म खूसी बनी ।
छन्दोहार गोविन्दप्रसाद ढुङ्गानाद्वारा लेखिएको कृति हो।
छन्दोहार
Author : गोविन्दप्रसाद ढुंगाना
Publisher : ने.भा.प्र.समिति
Subject : छन्दशास्त्र
Pages : १४७
Edition : पहिलो
Press : जोरगणेश प्रेस
Price : रु.१।७२
Published Date : २००१
(स्रोत : पं. बदरीनाथद्वारा सम्पादित पुस्तक “पद्य-सङ्ग्रह” बाट सभार)
