नेवारी कविता : व अय्ला हे खः मभिम्ह

~दिव्या बज्राचार्य~

छ मभिम्हः मखु
व अय्ला खः मभिम्ह
छंगु कुबुद्धि मखु
व अय्ला या खः कुबुद्धि

छंके ला शिष्टाचार माक्को दु
छंके ला मतिना जाय्क दु
व अय्ला हे खः छुँ मस्युम्ह
व अय्ला हे खः स्यंक ज्या याइम्ह

स्व छक छँ न्हायकं बालाक्क
छंगु ख्वा पिचुसे बाल्हा ः
स्व छं छंगु आत्मा बालाक्क
छंगु आत्मा यचुसे बाल्हाः

छंके ला विरता लिधना च्वंगु दु
छंके ला बुद्धि मचानिसे दु
व अय्ला हे खः लुच्चाम्ह
व अय्ला हे खः दक्को स्यकिम्ह

लः यागु पल्सा अय्ला बिया
स्वाँ होयका स्व स्वाँ गथे जुई
लः यागु पल्सा अय्ला तया
जा थुया स्व जा गथे जुई

छ मभिम्हः मखु
व अय्ला खः मभिम्ह
छंगु कुबुद्धि मखु
व अय्ला या खः कुबुद्धि

आखः ब्वने मापिं मस्त त्वलेजुई
अय्ला कुलु बौ स्वया
छेँ मा अबु गुली ख्वई
अयला कुलु काय् स्वया
छेँ कलाचीया सी मास्ती वई
अय्ला कुलु भात स्वया

वहेला, छ मभिम्ह मखु
व अय्ला खः छन्त मभिंका च्वम्ह
छंगु कुबुद्धि मखु
व अय्लाया खः कुबुद्धि छन्त स्यंका च्वम्ह

–दिव्या बज्राचार्य

(स्रोत : रचनाकारको ब्लगबाट सभार)