~रमेश भट्टराई ‘सहृदयी’~
रक्तनृत्य विरोधी शान्ति दूत बुद्धको हार छ आज
हिटलरको रक्त होलीलाई कत्रो सत्कार छ आज
पिपले खेतलाई मिलेर सधैं कुलो खन्थे छिमेकीहरू
दलित बाहुन्, बाहुन् दलित विरोधी दुई धार छ आज
दलालमा जात थिएन गरिबलाई औकात थिएन
हुकुमी चक्रव्युहले भाइमै पानी बाराबार छ आज
पद, प्रतिष्ठा र पैसाको चङ्गुलमा फसेका छन् बन्धु
चढ्ने, गिराउने चर्को महङ्गीको जन बजार छ आज
विरोध, वार्ता र सम्झौता चक्र भाँडाकुटीको खेल झेल
राहत, अनुदानमा समेत खुलेआम भ्रष्ट्राचार छ आज
रमेश भट्टराई ‘सहृदयी’
