~नारायणदेवी श्रेष्ठ~
अहा ! पोखरा गुली जक बांला: !
गगनचुम्बी च्वय् सुवर्ण मुकुट
माछापुच्छ्रे विशाल हिमाल ,
क्वय् च्वन चकना: फेवाताल
स्व:स्व:थाय् तक वाउँगु पर्वत ।
निर्झर नदीया भव्य मुहान
प्रकृतियागु सौन्दर्य अपार ।
अहा ! पोखरा गुली जक बांला: !
पशु झंग:त गुलिखे खानेदु
थ:गु संगीत न्यंका च्वंपीं,
बांबांला:गु थरि थरि स्वांत
जात जातया रंगिबिरंगी,
स्वां व सिमाया थुगु हरियालीं
शितलता बिल मनजिगु न्हीका: ।
अहा ! पोखरा गुली जक बांला: !
सुथया प्रहरय् मन्द समीरय्
प्रक्रिती देवीया रम्य कुटिरय्
राजनएे दिनेशया प्रणय लीलाय्
उज्ज्वल प्रकाश म्हिताच्वंगु मनोहर,
धन्य धन्य थ्व सुन्दर पोखरा
अनुपम द्रिश्यं भय्बियाच्वंगु ।
अहा ! पोखरा गुली जक बांला: !
थन दु सुन्दर मन्दिरा मस्जिद
महेन्द्रपुल व डेभिड फाल,
लोकय् नां जा: सकस्यां स्वय्न्ह्या:
द्रिश्य अलौकिक भव्य मनोहर,
स्वदेशी विदेशी यात्रुत स्व:वइ ।
अहा ! पोखरा गुली जक बांला: !
महेन्द्रपुल नं अतिकं गुल्जार
बजार जुईवं थाना अती न्ह्यइपु,
न्याय मदुगु नं छुं हे मदु थन
पोखराया बांला:गु बजार ।
त:जिगु देय्या गां धाएे\ ल्व:सां
प्राकृतिक धनं त:मिगु पोखरा ।
अहा ! पोखरा गुली जक बांला: !
बल भाव मनय् न्हूगु पुलागु
तालय् ल: थें बिलिबिली जाय्क,
लहर आनन्द थ्व ताल बिचय्
नांचाय् यात्राा वार व पार
पोखराय् न्ह्यइपुगु प्यन्हुया यात्रा
अशान्त मन जुल शान्त व सुखमय ।
अहा ! पोखरा स्वर्ग समान ।
– २०३४ साल
(स्रोत : नारायणदेवी श्रेष्ठको नेपाल संवत ११२७ मा प्रकाशित नेपाल भाषाको कविता सङ्ग्रह ‘मुकुस्वाँ’ बाट सभार)
