गजल : छोरीहरु

~सीता थारू ‘निश्छल’~

जानु पर्ने अरुकै घरमा छोरीहरु ।
अनि बाँच्ने अर्काको रहरमा छोरीहरु ।

जन्मघर आमा–बुवा सबथोक छोडेर
चिनाउँछन् अरुकै थरमा छोरीहरु ।

समता र समानता जे भने पनि
गर्नै पर्ने त्यसैको डरमा छोरीहरु ।

छोरा–छोरी एकै हुन्, उत्तिकै मान्यता
तर पनि बाँच्नु पर्ने करमा छोरीहरु ।

पढ्न सक्यौं भने, एकदिन पक्कै पनि
बस्नु पर्ने छैन, अरुको भरमा छोरीहरु ।

(स्रोत : परगोह्नी गजल संग्रह)