गजल : आँखा पर्नु हुन्न

~सुवासचन्द्र ढुङ्गेल~

धेरै माथि उडेपछि सिनोमा आँखा पर्नु हुन्न
फाइदाको कुरो देख्यो कि तलतल झर्नु हुन्न ।

सम्पत्ति सबैलाई चाहिन्छ जिन्दगी बाँच्नलाई
तर पैसाका लागि बजारमा नाम छर्नु हुन्न ।

जन्मदै मृत्यु पनि साथ ल्याएको हुन्छ मान्छेले
स्वार्थका लागि हर दिन सस्तो मृत्यु मर्नु हुन्न ।

मान्छेको भीडमा आफूलाई मान्छे भनी चिनाउन
हरियो देख्यो कि पशुझैँ जथाभावी चर्नु हुन्न ।

(स्रोत : मधुपर्क २०६६ जेठ)