~कृष्णभक्त श्रेष्ठ~
यतिन्जेल होहल्ला केही नगरी
सहज, सरल र स्वाभिमानी रूपमा
जे जसरी मैले जीवन यापन गरेको छु
त्यसरी नै एक सामान्य दिन
कसैले चालै नपाउने गरी
सुटुक्क हराउन चाहन्छु म
बिर्सिन चाहन्छु
हो, आजसम्म जे जति हासिल गरें मैले
त्यसको कुनै गर्व गर्न चाहन्न
अनि जे जति हासिल गर्न सकिन
न त्यसको दुखेसो नै
विगतको कुनै लेखाजोखा नगरिकनै
भन्नै पर्छ मैले
धेरै उकालो ओरालो गरिसकेको छु
गहिरो र पहिरो गरिसकेको छु
त्यसैले आफन्त कसैलाई पनि
शोक मनाउने मौका नै नदिई
सुइँकिन चाहन्छु
मैले भोग्दै गरेको कृत्तबाट
निकृत्त हुन चाहन्छु
मुक्त हुन चाहन्छु
घाम उदाउनुजस्तै सहज मेरो जीवन
घाम अस्ताउनु जस्तै स्वाभाविक होस्
सरल र सुगम होस् ।
