~बुद्धिसागर~
भोकै मरे बचेरा ती चारा जलेपछि
आगो पिई बाँचे कति धारा जलेपछि
निलोनिलो आकाश पनि भइदिन्छ कालो
टिलपिले यौटा सानो तारा जलेपछि
बालुवा नै टुक्रिदिन्छ सिसाको त्यो महल
निमुखाका मुठ्ठीभरि नारा जलेपछि
पक्कै कहीं हुन सक्छ केही उथलपुथल
सोच्नुहोस् है ! पानी-पानी रारा जलेपछि
कहाँ फुल्ला परिचय हामी नेपालीको
ढिक्काढिक्का माटो जति सारा जलेपछि
(स्रोत : प्रतिनिधि नेपाली गजलहरू – गजल सङ्ग्रह – सम्पादन : ललिजन रावल)
